《亲征平定朔漠方略》小段节选
<<beye dailame wargi amargi babe necihiyeme toktobuha bodogon bithe>> deri jalarame sonjohongge:neneme dergi hese wasibuha bade: cooha i baita be hese akv oci ume balai axxara. damu terei axxara arbuxara be tuwame saikan seremxe. dorgi geren babe ciralame toso, ume weihuken i neneme axxafi coohai baita be dekdebure sehe. geli monggoso aikabade jase de dosinjici, sain i gisurefi jase ci tucibu, ume balai wara seme tacibuha be dahame, amban be cooha gaifi boxome tucibuki seci hese be jurceme fiktu araha de ojorahv sembi. uttu ofi ing ni hafan tungserere niyalma be takvrafi, sain gisun i necihiyeme ulhibume unggici, monggoso geli anagan arame etuhuxeme jabumbi. amban be emu derei harangga teisu tuwakiyara hafan be ciralafi, oyonggo babe dendeme seremxebure, emu derei gorki be dahabure amba jiyanggiyvn tuhai de bithe unggire ci tulgiyen, ere jergi monggoso be eici amban meni beye cooha gaifi genefi wame mukiyebure, eici hafan takvrafi monggo i data de ulhibume gisurefi boxome bederebure babe dergici lashalarao seme wesimbuhede, hese amba jiyanggiyvn tuhai i beye ne xansi de bisire be dahame, jasei jakarame ibenjihe monggoso be eici tidu sei beye cooha gaifi genefi boxome bederebure, eici jasei ba i coohai hafan sa de ciralame tecibufi, meni meni teisu babe akdulame tuwakiyabufi monggo i data de hafukiyame ulhibume gisurefi boxome unggire babe amba jiyanggiyvn tuhai acara be tuwame jorime yabukini, ume baita dekdebure sehe. ere hetu fiyelen i gaiyakv ba seci, ere gese labdu gisun be damu emu cike i gisun i teile oho.
页:
[1]