Banjirengge uthai Abka gosiha dere

bajargi

Mini juwe funcehe biyai onggolo takaha emu Oros asihan nenehe aisin i usihanggi (11.25) de sejen jafame yaburede, ulha juwere emu truck de ishunde karcandufi feye ambula bahafi baji ome akū oho.       
   Ere hūturi akū baita be bi umai sarkū bihe, sikse bi Facebook de genefi, be dere acahakū ofi goidaha seme šolo bahafi acaki seme Nikita (ini gebu kai) de mejige isibuha bihe, teniken Facebook de emu "karu" mejige bahafi, ere ainci Nikita deri jihengge dere seme tuwaci, umai uttu waka, ini ahūn Nikolai deri jihengge kai. Tere minde alaha gisun, "saiyūn, si meni ahūn deo be ejembi seme erembi. ere marin sinde mejige jasifi alara baita bi. mini deo Nikita ini sejen de karcabuhabi" sefi, geli juwe asui holbon be buhebi. bi asui abdaha neifi tuwaci, Niosilandoi ice donjin kai, omšon biyai 25 inenggi tucike gashan i baita i jergi boolahangge. "...ajige sejen i tergeci, aitubure urse jihe amala baji ome bucehe" sembi. Ere mejige de bi emu erin de ten i gūwacihiyalafi, fuhali gelhun akū akdarakū bihe. Bi inu kenehunjerengge, Nikolai jasigan be bi tašarame tuwaha dere seme, cohome buleku bithe be baicame, ini araha "разбился" sere hergen be narhūšame tuwaha bihe (ini jasigan seci, Oros gisun i arahangge)...tuttu seme nenehe barun i ice fonjin be dahūn dahūn i tuwaha manggi, tašaraha ba umai akū be tengkime akdahabi. Ini akūhangge, ahūn be secibe, geli ini ama eme be secibe, ai hacin i jobolon de isibuha be, bi yargiyan i gūnime tucibume muterakū. Nikolai "akū oho" sorome serakū damu "karcabuhabi" sehengge, inu tere alimbaharakū usacun be jonome cihalarakū ofi kai. Bi seolehe manggi Nikolai de emu karu jasigan isibufi, mini usacuka gūnin be ulame alahabi.

   Nikita sere asihan be merkime gūnici, juwe funcehe biyai onggolo jugūn de takahangge kai. Emu dobori bi hūdai ba de jaka udafi bederehe de, niyalmai leolecere gisun be donjici, tese jing arki nure darabure de, meimeni gurun absi gisurere be gisureme bi, ere niyalma tere de alahangge, be "За здоровье" sembi sere be donjici, bi uthai ere niyalma Oros niyalma kai seme, beye forgošofi fonjihangge, "Вы русский?" sehe de, tere ferguweme jabume "inu" sehebi. Bi inde alame, bi jing Oros gisun be tacime bi sefi, ini henduhengge, Oros gisun de amuran tulergi gurun i niyalma be emken sabuhakū bihe, uttu ofi yargiyan i ferguwembi seme, geli mini baru Oros gisun i "sini gebu be ai sembi" seme fonjiha de, bi inu Oros gisun i jabuhabi. Tere fonde uthai meimeni galafun i ton be ejehe, amala acaki seme boljoho. Goidahakū bi uthai ini solire de, ini boo de genehebi. I kemuni minde alahangge, ini ahūn Nikolai mini baita be donjifi urgunjefi, inu mimbe acaki sehebi, uttu ini boode genehe de inu Nikolai be acaha.

   Be ishunde leolecehei injecehei, bi cende mini Oros gisun tacibure bithe be tuwabufi, Nikita uthai tere bithei dorgi acarakū geren babe gemu tuwancihyarelame, "ere jergi gisun be meni inenggidari umai gisurerakū kai" seme faitan hitereme, "donjici baibi ganio asuru ijishūn akū kai" sembi. Tere anggala, bi absi niyalma be Oros gisun i toore be sarkū ofi, tere ahūn deo uthai minde urgunjeme tacibuhabi. 7, 8 isime nantuhūn gibsun tacibuha manggi, geli mimbe gisureme tuwa seme, bi gisurere dari tese uthai kaka faka seme ambula injembi. Geli minde alahangge, si ereci absi ta seme jio, Oros gisun tacire de yaya ulhirakū babe mende ala, be cihanggai jai sinde aisilambi. Enenggi sinde tacibuha toore gisun, tanggū ubui emu ubu de seme inu isirakū kai, gisun taciki seci, toore gisun be tacirakū doro bio seme injeme hendufi, bi inu umesi urušehe kai. Donjici tese balamadara dabala secibe, julergi gurun i niyalma minde uttu tuwarangge be tuwaci, gemu sijirhūn niyalma, gululeci ombi kai. Tere amala, be geli emu mudan dere acaki seme boljoho bicibe, tere baita de ekšeme ofi fuhali acahakū...
   
   Ere jergi lolo sere gisun be gisurehengge, gūwa jalin umai akū, Nikita be ejetulere jalin kai. Niyalmai ergen be Abka jafame, buce seci uthai banjire ba akū. Mini takaha gucuse ere gese gashan de teisulebume akūhangge ertele ini teile, gūnihade ainamebahafi gasarakū. We niyalmai gese "si esi banjici, sinde kemuni saikan banjire inenggi bi" seme akdulaha bihe? Bucere inenggi be doigonde sarangge geli ya emke bihe? Jabšan de hono banjirengge, esi seci ojorakū abka mimbe gosiha seme alime gaimbi wakao?

fishcrystal

jaci sain

childez

truck……

bajargi

"truck" be absi manjurame ubaliyambuci sain be yargiyan i sarkū kai

Namutu

回复 bajargi 的帖子


kajen sere ombio~ kkk