满语广播电台第五期广播稿（全）

水做的绳子

一、报台及新闻 水做的绳子

geren donjire gucu, yamji saiyvn. be oci asu de bisire manju I manju gisun I selgiyedere tatan. be oci asude bisire manju I manju gisun I selgiyedere tatan. bi futa. Enenggi Cengde hoton de suwende sunjaci bilagan be selgiyedembi.

二、新闻

新闻一

genggiyen eldengge inenggidari serkiyen(光明日报) aniya biyai ice sunja de alame ulahangge. juwanci mudan I dulimbai gurun I irgen siden I xu wen faksimi(文艺) “alin ilha i xangnan”(山花奖) I xangnan selgiyeme bure dorolon be h’ai nan golo de yabubuhabi. “manju Irgen siden I jube” sere baicara hacin I xoxohon <manju irgen
siden I jube, Liyoodung ni debtelin> sere bithe, ere derengge eldengge be bahafi gaihabi.

ere bithe be, Liyoo Ning golo I “irgen siden I xu wen faksimi I baksi I duwali“ ilan aniya fayabume arahangge, uheri emu tanggv orin tumen hergen. arasisa, julgei endurin I jube, niyalma I ulabun, banjiha arbun jai irgeten I an tacin I jergingge be arame, LiyooNing ni suduri jai ba-I tacin be hvlasisa de takabumbi.

juwe minggan jakvci aniya, “manju irgen siden I jube”, juweci meyen-i gurun I jergi jakasu waka xu wen I hede de dosika be dahame, LiyooNing
golo, manju irgen siden I jube be baicara weilen be dahvme deribume, baicame weilere meyen be ilibuhabi. tereci “sunja aniya I karmara bodogon” be arafi, ilan aniya fayabume baicara isamjara jai karmara weilen be yabubumbihe.

新闻二

SinHvwa asu I halbin I tatan aniya biyai ice sunjade cohotoi alame ulahangge. sunjaci mudan I “sahaliyan ulai tuweri” sere gurusungge xu wen faksimi inenggi, ice duin de halbin hoton de deribuhebi. uheri emu minggan hamire geren hacin I xu wengge axxan be baba I kvwaran de yabubumbi sehe.

“sahaliyan ula I tuweri” sere gurusungge xu wen faksimi inenggi, emu minggan ilaci aniya deri yabubume deribuhe. juwe minggan nadanci aniya deri, ele bici ele labdu tulergi gurun adaname, te emgeri sahaliyan ula goloi emu oyonggo xu wengge temgetu ohobi.

新闻三

dergi amargi ba I asu aniya biyai ice duin de xu fiyelen arame, manju irgen siden I kumun be hvlasisa de takabuha. fiyelen de arahangge, manju irgen siden I kumun de amba muru juwe sekiyen bime, emude oci saman I wecen jukten, jaide oci buthaxara banjin. ereci tulgiyen, geli emu hacin dain afan jai urgulere dorolon ci sekiyenembi sehe.

nikan irgen I ucun de duibuleci, manju irgen I ucun I baktambun elei elgiyen ombi. buthaxame weilere, dailame afara, niyaman be kidure jergi ucun I uculen, tomorhon bime getuken. ucun I durun inu labdu bime, beyei cohotoshvn iletu ombi.

三、歌曲  水做的绳子

歌曲一   nurgaci han I giluk morin 胡松华

ememu bigan suduri bithe de ejehengge, seibeni taizu sure beile daiming gurun I cooha de amcabure de, terei yaluha giluk morin xor seme gabtara sirdan I adali ofi, teni bahafi ukame ofi, amala ilibuha gurun I colo be “daicing” sere, uthai ere turgun sembi. ere jube yargiyan ocibe taxan ocibe, kenehunjere ba akvngge oci, ambalinggv ejen de urunakv ere gese giluk morin bimbihe. <nurgaci han I giluk morin>, enenggi suwende takabuki.

歌曲二
arki ucun 宋熙东

mini takaha labdu manju gucu gemu arki omire de amuran. mini gvnin de, daruhai gucusei emgi arki omicara, embade uculeme maksire, yargiyan i emu urgun baita secina. uttu ofi, geren gemu ucun maksin be bahanara giyan. tob seme <arki ucun> de uculehengge I adali, bahanarakvci omi seme kerulere sehe.

歌曲三 萨满神歌

四、散文

gucu, si umai urunakv gubci jalan de sargaxanarakv

futa arahangge

【fiyelen uju】

sikse emu gucu i emgi leolecere sidende, tere emu giyangnan be donjinaki seme minde alahabi. giyangnara niyalma serengge terei gingguleme buyerengge inu. terei gvninde, jalan i gukure inenggi isinjinggele giyan i weilen be nakafi gubci jalan de sargaxanara, bithe arara....jai ere jergingge…

bi “gubci jalan de sargaxaname ” sere gisun be donjici, angga de niyanggvre niowanggiyan turi hvfun be elekei oksime tucibume, dolo gvnime, geli emu gubci jalan de sargaxanaki serengge!

bi heni majige gucui gingguleme buyerengge be wancara gvnin akv. damu ere ucuri gubci jalan de sargaxanaki sere niyalma dabali labdu: sakda eigen sargan boobe uncafi gubci jalan de sargaxaname, asihata weilen nakafi gubci jalan de sargaxaname, yaka hocikon hahajui unuhun be unufi gubci jalan de sargaxaname...

mini gisureki serengge, gucu, si umai urunakv gubci jalan de sargaxanarakv！

sini dalbade bisire sain be bahafi saburakvci, ai goro bade geneci geli ainara?

tuttu labdu jiha fayabume meihejen de kunggur seme jajanume tafafi Tanggvt de isinafi, faidan faidame Butala gurung de dosifi, daicing gurun i poo be jafafi tere jergi enduringge be hargaxara urse be kar kar seme niruganafi bederehe manggi, geren de alame beyei niyaman be bolgohobi serede, yargiyan i gvnirgan bio?

【fiyelen jai】

seibeni U I alin i bade fiyelekui cai be omirede, emu cai faksi minde fonjime, si fiyeleku i wa be bahafi amtahabio?

bi feser seme emgeri golohobi. bi xuwe cai omirede amuran secibe, cai wa dule musei ineggidari bethei fejile fehure naci jiderebe, daci gvnihakv bihe.

uttu ofi bi balai gvnime, ere cai wa, nai mumuhu i dolo udu aniya taksiha be sarkv, na i dorgideri boihon be dulefi, mooi fulehe be dulefi, abdahai sudala be dulefi, silenggi be dulefi, lamun abka be dulefi, suilara ursei gala be dulefi, bosoi fulhv be dulefi, tuwai mucihiyan be dulefi, fuifuha xeri muke be dulefi, yehere tampin jai moro be dulefi dubentele mini angga de dosimbikai.

uthai ere emu hvntahan i cai wa be mimde amtalaburengge seme inu tumen bunai aniya dulekebi dere. bi cai faksi i gvnin dosimbure gisun be donjire jakade, teni ere doro giyan be ulhihebi.

【fiyelen ilaci】

dade emu tacisi minde fonjime, sefu sinde yaka tolgin bio?

bi jabume, omingge jemengge bifi sain i banjirengge, bi te uthai mini tolgin de banjimbikai.

ainu musei tolgin be, weilen jai banjin de bakcilame tebumbini? ainu urunakv boobe uncafi gubci jalan de sargaxaname, weilen be nakafi dabagan alin be dabanambini? ainu urunakv duranggi sukdun be toofi beyei ufuhu bolgo seme temgetulembini? ainu urunakv hvntahan be feser seme fahafi jalan i dube be gisurembini?

erebe umai baiburakv!

bi usilan i dubede gemun hecen de alban baita icihiyanjihe fe tacin gucu i emgi, bujan i jugvn de leoleme yabume, bolori edun xeo xeo seme, xun i elden gelir gelir sembi. amala be geli gvwa emu gucu i boode genefi jabaxan be bahaki seme buda jembi. bi antahai tinggin de sofa mulan de dedume ergeme, murhu farhvn seme budai booci tucike yali furure jilgan, geli sogi oboro kar kar sere, nimenggi har har sere, leolere injere be donjimbi. amba hoton i yamjishvn isinjirede, ere gese jilgan niyalma be elhe taifin seme serembume, alin tala i gasha i guwendure nomun bithe be hvlara jilgan de isinarakv ba akv.

fe tacin gucu gemun hecen de jifi alban baita icihiyame, gvwa bade efineci ombicibe, sini jalin werifi embade sula oksome, sini gisun be donjime cihalambi. dade umai takanduhakvngge isan de acafi, sini jalin sarin belheme cihalambi.

ede bi jabxangga hvturingga seme serebume, yaya baita ere serebun be dangnaci ojorakv.

gucu, si umai urunakv gubci jalan de sargaxanarakv, umai urunakv emu usin kvwaran baifi morin ulebume moo giyarakv. aikabade an i ucuri giogiyan efen jetere seme inu urgunjeme, amtan be bahafi amtalaci, giogiyan efen uthai sini gvwa emu jalan. usilan i dubede gucusei emgi beyebe sula obume, gvwa emu hacin i banjin be serebume muteci, si amba muru emgeri gubci jalan de sargaxanaha, eci geli ai baihanambini?

emu gisun de obume, urgunjeme sebjeleci uthai wajiha, si yargiyan I umai urunakv gubci jalan de sargaxanarakv.

五、tanggv meyen 金标

【gucuse saiyvn, ubade jahari bihe, jabxan de asu de bisire manju i manju gisun i selgiyedere tatan de solibuha de umesi urgunjembi. enenggi bi tanggv meyen bithe i dolo udu fiyelen be hvlafi geren de alibuki.】

ere ucuri si geli aibide xodonoho, mudan talude mini jaikade inu majige feliyecina, ainu sini dere yasa oron sabuhakv bi, aifini age be tuwanjiki sembihe, gvnihakv, emu daljakv hetu fiyelen i baita de siderebu nakv, fuhali lahin taha, inenggidari fusu fasa, jaka xolo aika bio, akvci, enenggi hono bahafi ukcame muterakv bihe, minde hahi oyonggo baita bi seme kanagan arame gisurehei, arkan teni mimbe sindaha, jihengge umesi sain, bi jing alixambi, bi gvnici, sinde inu oyonggo baita akv, muse emu inenggi gisureme teceki, belen i buda majige jefi gene, bi inu encu booha dagilarakv, damu jihe dari, baibi age simbe gasihiyabuhangge, mini gvnin de elhe akv, tutu ofi, bi gelhun akv, ta seme jiderakv, si ainu tulgiyen obufi gvnimbi, muse atanggi si bi seme ilgambihe, jai udu inenggi giyalafi jiderakv oci, bi hono majige jaka dagilafi, cohome simbe helneki sere bade, emu erin i untuhun buda be geli aiseme dabufi jing gisurembi, tere anggala, siningge be bi ai jekekv , erebe tuwaci, iletu mimbe sini boode jai ume genere sere gvnin secina.

si cananggi yafan de waliyame genehe biheo, inu, ainu enenggi teni jihe, sandalabuhangge umesi goro, ineku inenggi mudali jici ojorakv ofi, tubade juwe dobori indehebi, sucungga inenggi hoton i duka neire ishun, uthai jurafi, yamjitala teni isinaha, sikse buda dobofi, geli emu inenggi dobori indehe, enenggi alin jakarame uthai jurafi amasi jihe, jugvn de udelereci tulgiyen, majige teyehe ba inu akv, arkan seme, hoton i duka be amcabuha, age gorokon i bade umbume sindahangge, udu sain baita bicibe, juse omosi de isinafi encehen akv oci, erinde acabume waliyara de mangga, eici ainara, fe yafan de fuhali ba akv oho, xengsin tuwara urse gemu tere babe sain elhe ojoro jakade, teni tubade eifu kvwaran ilibuha, eiterecibe, muse bici, bisire doro, akv oci, akv i doro, ai hacin i hafirahvn suilashvn sehe seme inu yafahan i genefi, emu hvntahan arki hisalambi, juse omosi de isinaha manggi, damu terei dekjire dekjirakv be hendure dabala, aika tere gese geterakv juse banjiha bihede, ini beye uthai yafan de tekini, hono ainahai emu afaha hooxan jiha deijimbini.

sikse wecehe yali jeke be dahame, uthai joo kai, enenggi geli tuibuhe yali be benefi ainambi, teike hono age be solinaki sembihe, age si sarangge, bisire akv, damu emu udu ahasi ulgiyan be tekdere, duha do be dasatara de, ya gemu gala baiburakv, tutu ojoro jakade, niyalma takvrahakv, sinde niyalma akv be bi tengkime sambikai, geli solire be aliyambio, uttu ofi, bi uthai gucuse be guilefi amba be jekenjihe, bi hono sitabuha ayoo sembihe, gvnihakv elgiyen i amcabuha, agesa boigoji be ume gvnin jobobure, uthai ahvn i bodome ikiri tecefi jeki, agesa ainu jeterakv, sile be den barafi jembi dere, ara, ere gisun taxarahabi, muse da joksun de, ere gese kooli biheo, ere yali serengge, weceku i kesi kai, hacihiyaci ombio, tere anggala, antaha jici geneci okdoro fudere be hono akv bade, ere durum i anahvnjaci soroki akv semeo.

【enenggi ubade jooki, aika mini hvlahade taxaraha ba bici, geren de mini jalin jorime tucibuki, geren de ambula baniha, manju gisun i selgiyedere tatan de ambula baniha, jai acaki.】

勒丁布壮

baniha

yasuka

怎么下载啊？

石成威

{:soso_e182:}