满族在线

 找回密码
 马上加入
查看: 28711|回复: 6

海蘭察列傳hailanca i faidangga ulabun

[复制链接]
发表于 2012-9-25 13:14:47 | 显示全部楼层 |阅读模式
hailanca,kubuhe suwayan i manju gūsai niyalma,dolar hala,jalan halame sahaliyan ulai bade tehebi,abkai wehiyehe i orici aniya solon uksin ci dahalame jun gar be dailaha,tuktan hoit taiji bayar baime dahanjifi,emgeri hergen fungnehe sirame amursana be dahame ubašaha manggi,amba cooha farganaha de hafirabufi
tarbagatai alin i dolo burulame genehe be hailanca fafuršame hūsutuleme fargame amcanafi gabtara jakade,morin ci tuhefi weihun jafafi bederehe,gungge be ilgafi erke baturu colo šangnafi,jai jergi hiya sindaha,dahanduhai uju jergi hiya sindafi hesei kiyan cing men de yabubuha,kemuni baitalabure hafan,jai emu tuwašara hafan šangnafi
jaksaka eldengge asari de arbun nirubuha,han i araha maktacun i gisun,amba edun de olhoho moo be meijebuhe gese,asuru suilahakū de uthai gungge mutebuhe,akdahangge inu ere jergi baturu ofi,akdun beki hūlhai feye be efulebuhe,ere tarbagatai sere bade ehe hūlha bayar be gabtahabi,encu hacin i amba gungge ilibuhangge erebe juru akū baturu seci ombi sehe.orin sunjaci aniya
hesei kubuhe suwayan i manju gūsade dosimbuha,gūsin juweci aniya sunja biyade,dahalame miyan diyan gurun be dailame genefi jorgon biyade amba cooha hū gioi men be tucifi,hailanca gabsihiyan moringga cooha be gaifi neneme genefi,g’an ta bade isinafi hūlha be ucarafi,ilan hūlha be gabtame waha,nadan helen jafaha,tereci loo guwan tun de nikenefi juwe tanggū
uju faitaha geli cooha buksifi duin tanggū hūlha be waha,hūlha kuwaran be gidanjire be dame genefi burulabuha sirame aniya jorgon biyade cooha gaifi wan žin guwan furdan be tucifi,g’a gio giyang ulai bade hūlha be gidaha gūsin duici aniya kubuhe lamun i monggo gūsai meiren i janggin sindaha,ineku aniya juwan biyade amba cooha geli loo guwan tun de nikenefi
sibe bade hūlha be afara de,terei mooi jase be efulehe,hūlha hashū ergi meyen be gidanjiki sere be hahilame afafi,hūlha be farganafi,amba dulin waha bime,geli juwe hūlha be weihun jafafi bederehe ishun aniya cooha gocika manggi,hesei uheri kadalara da ha guwe hing ni emgi jase kamni be tuwakiyabume bibuhe,gūsin ningguci aniya kubuhe šanyan i
monggo gūsai meiren i janggin de forgošoho tere ucuri amba cooha gin cuwan be dailara de hesei hailanca be yūn nan ci wargi jurgūn i coohai kūwaran de unggihe,gūsin nadaci aniya ninggun biyade,hebei amban fengšengge meimeni šancin be afara de,hailanca isinafi acafi fafuršame hūsutuleme afame gaiha tereci mardik ba be afame ibefi nadan biyade hūlha be
ts’ebdan i bade gidaha,jakūn biyade hūlha gungg’a alin i hashū ergi bade mudalime genefi jeku benere jugūn be hetureki sere be hailanca feksime genefi sujafi tanggū isire uju faitaha juwan biyade luding dzung,jai k’amser be afafi susai karun šancin,ilan tanggū yerutu bahafi ududu tanggū hūlha be waha,ede hesei saišafi gulu fulgiyan i monggo gūsai gūsa be kadalara
amban sindaha geli semsengge alin i antu ergici gesidi bade ibenehe omšon biyade alin i boso ergici ma giyo u i amba šancin be durime gaifi bulak jai jak’ar šancin be gidanafi yerutu karun be uyunju baha jorgon biyade ibefi mingg’o dzung ni bade nikenefi šancin i duka be sucuname dosifi hūlhai nomun hūlara taktu be deijifi šuwe meino i
bade isinafi dzanla i ba be necihiyehe ede hesei hebei amban sindaha tere fonde amba cooha ilan jugūn dendefi gin cuwan be dailame ibenefi hailanca jiyanggiyūn wenfu be dahalame gungg’arla ci dosika gūsin jakūci aniya juwe biyade si ling ni baru ibeme suknai ba be duleme yabure de juwe karun durime gaiha meyen i amban esentei i
emgi acafi geli sunja yerutu karun durime gaifi juhe sacifi jugūn neifi emu inenggi sidende si ling ni bade hanci adaha mug’om i bade isinaha si ling ni bade hūlhai yerutu labdu oyonggo ba be aliha amba yerutu juwan bi ilan biyade hailanca esentei dendefi uyuci juwanci yerutu be afara de juhe nimanggi de amasi
julesi funtume hūsutuleme afame gaifi holtome cooha gocika arafi geren hūlha faragajiha be buksiha cooha tucifi,hūlha be juwe tanggū waha han hafan cooha miyoocan wehe de jailarakū bime,hailanca ele fafuršame baturulaha seme hesei jurgan de afabufi dabali ilgame gisurebufi,ilan jergi nonggiha sunjaci yerutu ele beki akdun ofi
hailanca inenggi dobori akū poo be juweme isibufi fushubure jakade ambula hūlha be gisabufi dahanduhai yerutu be efulehe anagan i ilan biyade gurifi dajak giyo alin be afaha duin biyade dajak giyo alin i mulu ci destung šancin be durime gaifi tereci amba moo i jase be afara de hūlha ududu mudan dalbakici uncehen heteme sucunjire be
hailanca hūsutuleme afame sujaha,tere nerginde,hese wasimbufi tubai ba na i nirugan be jorišame ulhibure jakade,hailanca dahūme gungg’arla alin i angga de genefi afame hūlha be kejine waha jafaha sunja biyade dasame si ling ni hūlhai feye be afame genefi poo i karan be hūlhai ejelehe hada de teherebume weilefi geren hūlha be
ambula gisabuha turgunde han saišaha ninggun biyai ice nadan de amagi jugūn i hūlha dimda i babe durifi deng cun i bade hanci adaha yerutu šancin be ejelehe be hailanca feksime genefi sujame afara de hūlha bederehe jing oyonggo ba be ejelefi ciralame tuwakiyame bisire de amba kūwaran olhocuka sere be donjifi ekxeme mug’om i
bade genehe isinaha manggi jiyanggiyūn fafulafi si ling ni ba i cooha be gocika juwan de amba kūwaran gaibuha manggi hailanca meyen i amban fuhing be cooha be teksilefi tucibufi ini beye fiyanjilaha dobori dulin de gungg’arla i nio tiyan bi i kūwaran de isinafi fafulafi gungg’arla i cooha be gocika juwan emu de gocika cooha be gaifi esentei sebe jugūn neime yabubume
ini beye fuhing purpu nio tiyan bi i emgi fiyanjilame yabume tere yamji cung de i bade tataha juwan juwe de meino i bade isinafi meyen i amban becingge udai horonggo sei emgi acafi meino barang ni ba be akdulame tuwakiyaha tereci aisilara jiyanggiyūn agūi i amargi jugūn be neime hafumbufi weile arara be baime feksibume wesimbuhede
hese wasimbuhangge te hailanca lio bing tiyan fulehun se emgeri emu bade acaha be dahame damu ujen fisin i gamame uthai meino ci mingg’o dzung de isibume ere emu girin i ba be gemu giyan fiyan i bodome icihiyame gūwa oyonggokon bade hafumbuci acarangge be hahilame hafumbume gisabuci acarangge be muterei teile gisabume urunakū dzanla okši i ba be ejelefi cooha be
teksilefi coohai sukdun be huwekiyebume yendebufi,encu icihiyara be kicekini agūi hūlhai bai gūbadame yabuha be donjifi urunakū amba cooha be amasi gocifi hūlha be icihiyara be dahame agūi hailanca emu bade acaha manggi,amba muru uthai toktobuci ombi sehe,tere fonde udai be bibufi uhei meino ba be tuwakiyaha bihe,hūlha ududu mudan bireme sucunjiha be
gemu afame burulabuha amba kūwaran ci gocika niowanggiyan turun i cooha burgišame samsihangge labdu ofi hailanca oliha cooha be amasi unggifi ice coohai gūnin be acinggiyara be akū omki seme baime wesimbuhede han terei gisun be urušehe,hailanca julergi jugūn i cooha kemuni sengge dzung ni bade tataha agūi
dangg’arla de kūwaran iliha be mejigešeme safi minggan cooha dendefi esentei de kadalabufi julergi alin ci okdobume unggihe,geli purpu be ilan tanggū cooha gaifi okši i jergi geren kamni angga be geterebuhe,ede han hailanca be meino de tefi ba na be bolgo obume toktobure geren hūlha be gisabume wara giyamun
sirabure baita icihiyahangge gemu nashūn giyan de acanaha seme saišaha,nadan biyade meino mingg’o dzung ni ba gemu tuwakiyara de ufaraha turgunde hailanca bederefi ži rung ni ba be tuwakiyaha ede han hailanca be meino i bade tuwakiyame tefi,arga deribufi hūlha be sujame muterakū uthai tuwakiyara be ufarahangge,yargiyan i bahaci acara weile bi aika geli
nendeme turulame ukame jailara be bici agūi ži rung ni bade isinaha manggi getukeleme beidefi yargiyan be jafafi wakalame wesimbufi weile toktobu seme wakašaha jakūn biyade agūi ži rung ni bade isinafi wesimbuhengge,hailanca cooha burgindure nerginde i kemuni juleri amala kame ilibumbihe,umai oliha cooha i sasa burgišame jailaha ba akū damu an i ucuri coohai
fafun be getukeleme ulhibume muterakū be,dahame yargiyan i weile ci guweci ojorakū seme wesimbuhede,hese hebei amban ci nakabufi meyen i amban obufi,kemuni hafan efulefi tušan de bibu,ini ne tušan i hanja ujire menggun jai bahaci acara ufuhi be gemu bahaburakū obu,encu hūsun bume faššaha ba bici,jai da an i obukini sehe,ineku biyade
hesei agūi be wargi be toktobure jiyanggiyūn obufi jugūn dendefi dasame cooha ibekini seme afabuha,hailanca meyen i amban cingcing purpu booning sei sasa jakūn minggan cooha gaifi damba dzung ni amargi alin ci jugūn gaime ilan jugūn dendefi ibeme sydakla ag’ar buri šodzangg’ar alin i mulu be emu erinde ejelehe omšon biyade sebser i bade isinafi kemuni ilan
jugūn dendefi wasihūn gidanara jakade,biyesman i amba ajige juwan funcere šancin be durime gaiha,geli fuhing sei emgeri beg’ar giok dimda burangg’o dzung ni jergi šancin be neneme amala afame gaifi amba cooha geli meino i ba be ejelehe turgunde han hailanca faššame yabuhangge saišacuka seme ini hafan
efulefi tušan de bibuhe babe,da an i obufi tušan de bahaci acara hanja ujire menggun ufuhi be inu an i bahabuha gūsin uyuci aniya aniya biyade agūi ilan meyen dendefi hailanca ujui meyen i cooha be gaifi mingg’o dzung ni baci gug’a alin baru ibefi karun i hūlha be miyoocalame waha,geli booning ni sasa juwe minggan cooha gaifi ramram i hetu
mulu ci jakūnju funcere ba mudalime yabufi,umesi den denggu alin be afame gaiha denggu alin de bakcilaha robowa alin oci inu hūlhai umesi haksan ba juwe biyade purpu alin i mulu be jafame ibehe hailanca mudalime alin i boso ergici tucifi,wehei fiyeren deri tafara de hūlha den baci wasihūn gidanjifi,hailanca jing fumereme
afahai bisire de,esentei booning isinafi uhei hūsun i toktome afara jakade,hūlha majige milarafi geli meyen dendefi ergen šeleme bireme sucure be ilihai ududu juwan hūlha be waha,funcehe hūlha niru hadahai burulaha,tereci bederefi robowa i julergi alin be gaifi,ilaci duici hada de nikenefi hūlha be gabtame
waha,esentei jai hada purpu ujui hada be afafi gemu gaiha.han robowa alin oci, hūlhai haksan oyonggo duka uce i ba afame gaire de hailanca ele hūsun buhe seme,hesei dorgi amban sindaha,ilan biyade duici hada ci wasifi,wehei karun be ilan durime gaifi hūlha be tanggū waha,tereci destung šancin be gaiha
duin biyade agūi i emgi hebešefi žir badangg’a i baci mudalime ramram i ba i amargi jugūn be heturere de hūlha talman talmaka be amcame alin i meifehe de juwe yerutu weilehe be hailanca cooha gaifi efulehe sunja biyade ramram i ba i amargi alin de meyen i amban usihada de aisilame jase weilere de hūlha ududu mudan bujan šuwa ci
necinjire be esentei i sasa acafi afara jakade,hūlha burgindume burulaha ninggun biyade sebengbu i ba be afara de hūlha ninggun amba yerutu ilibufi hashū ici ergici dame aisilara be esentei hashū ergi juwe yerutu be gaiha usihada ici ergi emu yerutu be gaiha hailanca i teile dulimbai ilan yerutu jai hanci bisire necingge šancin be gaiha
nadan biyade sebengbu i ba i julergi ekcin de isinafi alin i kes den nilhūn ofi hafan cooha gala bethei werdeme tafafi dergi wargi hada i yerutu šancin i hūlha be gisabume wahai wajire hamika geli ramram ba i alin i buten ci dosifi etehe hūsun de židze alin i angga be afara de afara yerutu be ududu juwan
necingge yerutu be tanggū mooi hoton be sunja wehei karun be susai gaiha han hailanca be haksan hailashūn de jailarakū afaha dari urui etehe be dahame geren ci ele colgoroko seme jurgan de afabufi dabali ilgame gisurebufi ilan jergi nonggiha tere fonde hūlha g’aribu dasino i mooi hoton be akdulame tuwakiyaha
bihe hailanca alin i yohoron i hashū ergide mudalime genefi esentei alin i yohoron i ici ergici uncehen heteme afara jakade meyen i amban guwandase i dulimbai jugūn i coohai sasa etefi uthai ibefi sungrdzung ni ba be wargi ergide uncehen hetefi šuwe hūlhai šancin de nikenefi hafan cooha funturšeme fafuršame ememu wan ilibufi
tafara ememu fu be fondolofi dosire ememu funtuhu ci fekume dosire jakade hūlha na be gūldun arafi somime dosifi gelhun akū tucirakū oho ede hesei saišaha uyun biyade sungrdzung ni ba i mukei yerutu be gaifi hūlhai muke gaire jugūn be lashalafi nashūn be amcame terei amba šancin be
afara de hūlha miyoocan wehe lakcarakū miyoocarara fahara turgunde hailanca hashū ergi šakšaha de feye baha tere nerginde esentei emgeri sungrdzung ni ba i ici ergi ujui šancin be gaiha,hailanca cooha gaifi jai šancin de nikenefi afame gaifi fekume dosisi gisabume wahai wajire hamika ede hese wasimbuhangge,hailanca feye teni yebe ome an i cooha
gaifi begi yerutu be afame gaihangge,ele saišacuka agūi de afabufi cese de ejefi le-u-wei be afame gaiha manggi,suwaliyame ilgame gisurekini sehe,juwan biyade meger alin i mulu jai mila g’aram i ba be ejelefi amba šancin be emke wehei yerutu be duin gaiha meger alin i amargi uthai k’ai liyei i amba šancin inu
geli nashūn be amcame gaiha turgunde hesei dasame hebei amban sindaha geli meger alin i wargi ergici cooha gaifi bulaksen i ba be gidanafi ibefi gesbar i ba be afara de šancin be ududu tanggū deijihe,geli meyen i amban usihada sei emgi darjak šancin be gaifi k’ai liyei i hanci bisire yerutu karu be wacihiyame
gaiha turgunde hese wasimbuhangge hebei amban hailanca ududu mudan funturšeme faššahangge geren ci colgorokobi ere mudan yerutu be efulehe hūlha be wahangge inū hūsun bume faššahabi hailanca be gocika hiya de yabukini sehe.omšon biyade dobori dulime alin i yohoron be dulefi gerukgu alin i angga de dosifi kes fiyeleku cokcohon bime geretele hafan cooha tafakangge ninggun
tanggū bi ede hūlha uhei hūsun i sujara de terei yerutu be juwe durime gaifi sangg’asmat i bade gidanafi uthai deo-u-dang-g'a alin ci ibefi šamlakioi širde i jergi šancin be gaiha geli cooha gaifi gesi žungg’ang jai dzoguding ni hūlha šancin be afame gaifi alin i yohoron alin i mulu be hetu dabafi šuwe birai dalin de nikenefi
afara yerutu šancin be bahangge doloho seme wajirakū tereci damba i hafan cooha de acaha,han hailanca i gungge be saišame jurgan de afabufi dabali ilgame gisurebufi ilan jergi nonggiha jorgon biyade sangg’asmat alin de isinaha manggi hūlha yerutu i tule mooi hoton ilibufi daliha be hafan cooha
embici jase i jaka deri dosi gabtara,embici jase i moo be isifi afara jakade mooi hoton be efulefi hūlha be ududu juwan waha etehe hūsun de terei afara yerutu be gaime afara de hūlha be ambarame gisabume waha dehici aniya aniya biyade k’angsar i baci jugūn dendefi afame ibefi amba yerutu be
uyun wehei karun be tofohon gaifi geli alin i yorohon i yerutu šancin be ejelehe juwe biyade giyarna šancin be afame gaifi geli birai cikirame bisire symesda i ba i amba yerutu mooi hoton wehei karun be gaiha ilan biyade legirbo šancin be afara de hailanca alin i buten i juwe yerutu be afame gaiha hūlha g’ardan juktehen ci dame jihe be
afame burulabuha duin biyade jiyanggiyūn agūi hailanca be i hi i bade genefi mingliyang ni emgi acafi cooha dosire jugūn be baicame tuwafi inenggi boljofi uhei afakini seme unggihe ede han hailanca be amasi julesi kicime tuwame yaburengge umesi nashūn giyan de acanaha seme juwe amba suje šangnaha tereci minggan cooha dendeme kadalabufi fuk’anggan i
sasa I hi i bade genefi neneme giyaso i hūlhai yerutu be gaifi ibefi deleng alin be gemu afame gaiha bime geli saksagu i amba ajige šancin be ududu tanggū deijifi wargi amargi jugūn i cooha acaha sunja biyade bamtung ni ba i juwe amba yerutu be afara de hailanca miyoocan wehe be funtume mooi hoton be
efuleme neifi gaiha etehe hūsun de serwai anji dagiyabu i jergi šancin be afame gaifi šuwe g’ardan juktehen de isinafi deijihe turgunde hesei jiyanggiyūn hebei amban be forgošome icihiyahangge sain seme saišaha,ninggun biyade žungg’arbo alin i mulu ci bajan šancin be afara de hūlha haksan de ertufi sujaha be ududu mudan afaci gaihakū
nadan biyade šetu wang karun ci mudalime uncehen heteme afaki seme hebešefi hailanca cooha gaifi ibefi uthai kunser alin i mulu be ejelefi g’okdo i afara yerutu be suwaliyame afame gaiha,laku lama juktehen jai dzaidzedahai de ibefi geli jangg’a i amba yerutu be afafi gaiha geren jugūn i cooha be acafi le-u-wei i hūlhai
feye be gidanara de hailanca togulu i baci yohoron be dulefi šuwe alin i mulu de tafaka jakūn biyade lungsyde i ilan šancin be gaifi geli ba dendeme cooha buksifi dobori dulin de uthai le-u-wei be afame gaiha turgunde,hesei jurgan de afabufi dabali ilgame gisurebufi ilan jergi nonggiha uyun biyade cooha be teksilefi šuwe
ga-ra-i be afara de tuktan dasli i ba i jingkini jugūn deri dosiki sembihe hūlha doigomšome belherahū seme halafi da-u-da-wei i ba deri ibehe hailanca mudalime molugu i ba i wesihun ergide isinafi g’akdi cordan i jergi šancin be ikiri durime gaifi geli siri alin i mulu jai kobkioi i jergi yerutu be gaiha juwan biyade dag’a be
afara de dulimbai jugūn deri dosifi juwe galai cooha be dalbakici uncehen heteme unggifi juwe beki yerutu be gaifi wasihūn yamapeng šancin be gidanaha,anagan i juwan biyade hūwang ts’oo bing ni ba be ejelefi hafan cooha jase jafafi hūlhai dame necinjire be lashalaha hūlha geli emu mooi hoton iliha be hailanca cooha gaifi jendu mudalime
mooi hoton i cargi de genefi dergi ci fejergi baru gidanafi gaiha ede hese wasimbuhangge hailanca yerutu kamni be durime afara dari gemu geren be gaifi turulame tafafi isinaha ici etehe be tuwaci gungge faššan ele geren ci colgoroko amaga inenggi cooha marifi gungge ilgara de urunakū kooli ci tulgiyen kesi isibure dabali šangnambi hailanca
ele hūsutuleme fede sehe,omšon biyade jugūn dendefi bemburum i ba be afara de dobori be amcame jendu alin i fejile nikenefi hūlhai mooi hoton be deijifi hafan cooha bireme tafara jakade hūlha burginduha tereci siri i jingkini šancin be ejelehe,ede ilgame gisurebufi emu jergi nonggiha geli šelgudzuru i duin šancin be gaifi ibefi yamapeng ni
jingkini šancin be afara de dulimbai jugūn deri cooha buksifi purpu sei sasa hanci šurdeme bisire šancin be gemu ejelehe jorgon biyade lewei lemtung ni wehei yerutu be gaifi kobkioi i bade isibume jase jafafi hailanca miyoocan wehe be funtume ibefi utala hūlha be be gisabume wafi,etehe hūsun de solunggu dembar mentus i jergi šancin be gaiha
han hebei ambasa be ambula faššame yabuha seme jurgan be afabufi dabali ilgame gisurebufi ilan jergi nonggiha hūlha geli bugar ba i wasihūn ergide moo iktambufi jendu buksifi hafan cooha be okdome sujaha be hailanca cooha be ilan jugūn dendefi sasa ibefi ilihai andande afame milarabufi uthai kisigi i ba be gaiha geli cooha tucibufi
kurna emlido i geren šancin jai baske i amba šancin i hūlha be wacihiyame gisabuha turgunde,dabali ilgame gisurebufi ilan jergi nonggiha dehi emuci aniya aniya biyade šeci yongjung juwe juktehen be gaifi hailanca neneme ga-ra-i birai dalin de isinafi hahūrafi dahanduhai fuk’anggan purpu sei sasa ga-ra-i i ici ergi be gidanafi amba wehei karun be
durime gaifi poo be guribume ibebufi terei amba šancin be fushubuha juwe biyade fudarkan hūlhai da sonom geren data i sasa šancin ci tucifi huthubuha tereci gin cuwan i ba necin oho ede hesei hailanca be uju jergi colgoroko baturu heo fungnefi juwe yasai funggala šangnafi hadabuha cooha gocifi amasi marire de
han liyang hiyang hiyan i hoton i julergi ergide enggelenefi joboho arara dorolon be yabubufi han i yalure enggemu tohoho morin emke šangnaha han jaksaka eldengge asari de wesifi isinjiha doroi nure omibufi suje orin defelinggu menggun minggan yan šangnafi asari de arbun nirubufi julergi susai gungge ambasa de dosimbuha
han i araha makdacun i gisun tere bayar be gabtaha turgunde teni hiya de dabali baitalaha tereci ulhiyen i gūsa be kadalara amban sindafi terebe hebei amban obuha ucarahale beki yerutu šancin be urui gemu nedenme tafakabi,umesi baturu bime geli bodohonggo uttu ofi faššan be saišame heo fungnehengge yargiyan i teherehebi sehe,dehi ilaci aniya hiya kadalara dorgi amban sindaha,dehi
sunjaci aniya siden nirui janggin kamcibuha,dehi ningguci aniya ilan biyade g’an su i salar hoise hūlha su sy ši san temšeme ice tacihiyan ilibure jalin geren be isabufi ho jeo be efulefi hūwa lin šan alin be ejelefi ududu mudan lan jeo i hoton be necinjihe turgunde hailanca hese be alifi giyamulame genehe duin biyade lan jeo de
isinafi cooha gaifi lung wei šan alin i hūlha be gisabume funturšeme afara de hūlha yeru de somifi bucetei tuwakiyaha tere nerginde aliha bithei da gung agūi isinafi hailanca be kūwaran i baita be uherileme icihiyabuha sunja biyade mingliyang esentei sei sasa hashū ici ergi meyen dendefi wesihun gidanara jakade hūlha burulaha hailanca utala hūlha be
gabtame wafi geli lung wei šan alin ci yohoron be fekume dulefi gaihari hūwa lin šan alin de tafara jakade hūlha golondufi yeru de bisire elengge gemu tucike hailanca bederere arame hūlha geren be gaifi farganjiha be cooha marifi afara jakade hūlha gelhun akū hanci latunjihakū anagan i sunja biyade alašan i moringga cooha be
gaifi hūwa lin šan alin i wargi julergi ergi de mudalime genefi jendu buksifi gaitai yohoron ci bireme tucifi hūlha be hetureme waha geli tuliyan cooha be gaifi hūlhai duin karun be gaifi morin be waliyafi yafahalame afara de miyoocan i feye baha,han hailanca i joboho be jilame,agūi de
hese wasimbufi gosime dorombuha, hūlha haksan alin de ertufi akdulafi tuwakiyame bisire de hailanca kaidu morin i u ciowan šan alin de genefi hūlhai arbun be kimcime tuwafi hūwa lin šan alin i yohoron de amasi marifi taka buksifi, hūlhai feye de bederehe be mejigešeme safi ekšeme tucifi hahilame afara jakade uthai hūlha be gidaha ede
han saišame šangnaha bahabuha,ninggun biyade hūlhai kūwaran de dosifi hūlhai maikan felhen be deijifi hūlha bederefi hūwa lin sy juktehen be tuwakiyaha hafan cooha hūwa lin sy juktehen de nikenefi jase alifi geren hūlha be wacihiyame gisabufi,dalaha hūlhai uju be faitafi geren hoise irgen de tuwabure jakade tereci hūlha getereke,hese wasimbuhangge ere mudan salar hoise hūlha be gisabume
mukiyebure de hailanca umesi faššahabi,ini jui anlu be ilaci jergi hiya sindafi huwekiyebure be tuwabu sehe,dehi uyuci aniya duin biyade g’an su i fudaraka hoise geli ice tacihiyan be cisui ilibure jalin,geren be isabufi baita dekdebuhe turgunde,han hailanca be giyamulame unggihe,sunja biyade hesei hebei amban sindafi aliha fuk’anggan sei emgi
acafi gisabukini seme afabuha,tere fonde hūlha di diyan i bade tomoho bihe,hailanca baturu hiya sabe gaifi jendu hūlhai yabure jugūn be mejigešeme genefi hūlha be ucarafi okdome afaha,dahanduhai cooha dendefi ibefi afara de hūlha gidabufi burulafi hūlha be tanggū waha ninggun biyade šuwang hiyan i ba i ajige jugūn deri hūlhai feye de isinafi
ba na i arbun be šurdeme tuwafi karun ilifi hanci nikenehe,nadan biyade kaha de hafirabufi hūlha karun be bireme ukaki sere be,hailanca doigomšome kamni bade cooha buksifi nišalame wafi,uthai ši fung pu be efulefi dalaha hūlha jang wen king sebe jafaha,ede hesei hailanca i jui anlu be jai jergi hiya sindafi,
kiyan cing men de yabubuha geli jalan halame sirara baitalabure hafan šangnafi uthai anlu de sirabuha susaici aniya jorgon biyade hesei dabakūri dorgi hoton morin yalubuha susai juweci aniya tai wan i fudaraka hūlha lin šuwang wen giya i hiyan be kaha turgunde,nadan biyade
hesei hailanca be hebei amban obufi jiyanggiyūn fuk’anggan i sasa gisabume unggihe,juwan biyade hailanca,lu dzi giyang be doofi dalin de tafaka amala ilan inenggi sidende orin baturu be gaifi,jang hūwa hiyan i ba guwa šan alin de isinafi ba na i arbun be tuwara de hūlha alin i ninggude karun sahara be sabufi morin be dabkime nendeme tafaka
hūlha dur seme isinjiha manggi hailanca udu hūlha be gabtame wafi,geren hūlha gelefi burulaha,han hailanca tai wan de isiname uthai komso i geren be afame mutehe seme hesei saišabuha,omšon biyade ben giyang deri jugūn neifi fuk’anggan i sasa giya i hiyan be dame genere de sunja meyen dendefi jugūn i unduri suweleme
gisabume luwen dzi ding luwen dzi wei deri nio ceo šan alin de nikenehe bici tumen funcere hūlha birgan i cargi de akdulame tuwakiyaha hailanca birgan be dabafi alin i mulu de ekšeme tafafi hūlha i jase be afame gaifi hūlha burulaha,da pai ju i bade farganafi hūlhai tobo be wacihiyame deijifi hiyan i hoton de
nikenefi kahangge subuhe,ede hese wasimbuhangge,hailanca onggolo gin cuwan i bade faššaha ba dembei iletulehe,te geli beye geren hafan cooha ci nendefi jursuleme kahangge be afame efulefi,geli cooha gaifi hoton tucifi amasi julesi gisabume wahangge yargiyan i baturu bodome niyalma ci dulekebi,gung ni hergen wesibume fungnefi,erimbu wehei jingse duin mulfiyen muduri noho
kurume šangnafi ini gungge faššan be temgetulekini,hailanca oci,solon i ba i niyalma ududu mudon(原文如此,应为mudan,转者注。) gungge faššan ilibuha turgunde,nurhūme wesibume tukiyeme baitalaha bime,te cohotoi ferguwecuke kesi isibume encu hacin i dosholome tuwahangge,inu harangga ba i hafan cooha be teisu teisu huwekiyeme yendere be sara de isibuci ombi sehe,dahanduhai jai jergi colgoroko baturu gung fungnehe
jorgon biyade hoton i wargi ergi da luwen juwang ni hūlha,jai mederi dalin i hūlha be gisabufi,geli hoton i dergi ergi hing hūwa diyan,jai yuwan lin i hūlhai tokso be deijifi,cooha gaifi šuwe amargi jugūn be gisabume genehe,tere fonde hūlha jung lin i bade tomofi,ele etenggi balama bihe,hailanca miyoocan wehe be funtume
feksime ibefi afame efulefi,da fu lin,da fu wei i jergi tokso i hūlha gemu burulaha,tereci deo lu men be bargiyame gaifi šui ša liyan i bade isinaha bici,hūlha aifini ukaha songko be dahalame suweleme jafame morin yalure kiru jafaha hūlhai data be gabtame goifi weihun jafafi šuwe da lii i i hūlhai feye be afafi hūlhai
data be ududu juwan hūlhai hoki be juwe tanggū waha,dalaha hūlha fandzi i gašan de ukame dosika be,hailanca uthai nei šan alin i ping lin dzi i bici suweleme ji ji fu de isinafi,hūlhai šancin amba birgan i cargi de iliha be sabuha turgunde,hailanca morin be dabkime omilame dulefi,hūlhai šancin be efulefi,juwan funcere ba
fargame,hoo hūwai giyo i bade isinafi,orhoi tobo be minggan deijihe,geli siyoo ban tiyan šan alin i hūlha i šancin be afara de,hailanca beye jecen i ba be giyarime baicafi,dergi ši giyo šan alin i hada ci mudalime ši dzi teo be tucifi,da tiye liyoo,jai hiya gu he hūwan i jergi gašan be afafi ten i
amargi ergi tan yoo i bade isinafi,hoki hūlha be suweleme jafaha,susai ilaci aniya aniya biyade,dalaha hūlha lin šuwang wen be loo kioi ki i bade weihun jafafi,gemun hecen de olji alibuha,ede han hailanca i gungge be saišame,beye ashaha fadu be gaifi šangnaha,juwe biyade cooha julergi jugūn de isinafi,wan lii gašan ci da mu
giyang šui di liyoo i jergi ba i hoki hūlha be gisabure de,ten i julergi ergi lang kiyoo i bade farganafi,alin i mulu ci mederi dalin de isitala,meyen faidafi, hūlhai da juwang da tiyan be jafafi,giyai de faitarame waha,tereci tai wan i be necin oho,ede hese wasimbuhangge,hailanca ududu mudan cooha gaifi afara de
umesi fafuršame baturulaha bime,eiten baita be tulbime icihiyahangge gemu giyan fiyan i gamahabi,jai kesi isibume šušu bocoi julhū,haksan bocoi gūran i šuru erihe šangnafi,doshon terengge be tuwabukini sehe,geli hese wasimbufi,tai wan fu i hoton,jai giya i hiyan de gemu fuk’anggan hailanca sei bisire be amcame jukten i boo ilibufi, ūren muruliha,geli
jaksaka eldengge asari de orin gungge amban i arbun be nirubuha,han i araha makdacun i gisun baturu haha bithe be bahanarakū bicibe,banitai bodogon mergengge saisa ci eberi akū bai kaidu morin i beri daraha seme bata hūlha gelhun akū hiracarakū tenteke dalaha hūlha be weihun jafaki seme terebe gabtacibe ergen funcebufi weihun gajihabi,tede
gung ni hergen šangnafi,dabali kesi isibuhangge terei faššan be gisurehe seme wacihiyame mutehekūbi sehe,susai ningguci aniya k’ork’a i hūlha amargi dzang ni ba be gasihiyame jobobuha turgunde,omšon biyade han an i fuk’anggan be jiyanggiyūn,hailanca be hebei amban obufi baturu hiya solon cooha be emu minggan gaifi dailabume unggihe,jorgon biyade si ning ci jase
tucike,susai nadan aniya ilan biyade,amargi dzang de isinafi,duin biyade ladzi i bade feksime genefi,jeku juwere be šorgime yabubuha,anagan i duin biyade dililanggu i bade isinafi, fuk’anggan i emgi žunghiya niyelam de dendeme genefi,ba na i arbun be narhūšame baicaci,jirung ci cooha dosiki seme boljome toktobufi,duin meyen be dobori dulime
ibebume unggifi,hailanca,amatai sei sasa dulimbai jugūn deri wesihun afame,abka gereme hūlhai julergi yerutu be durime gaiha,hūlha tucirakū,amargi yerutu be tuwakiyara de,hafan cooha dalbai fu be efulefi,dosifi loho be jafafi afame hūlhai data be ilan,geren hūlha be juwe tanggū waha,juwan funcere hūlha be weihun jafaha,etehe hūsun de
marg’ar hiyargiyan alin i mulu de isinaha bici,alin i fejergici fulgiyan kiru jafaha,hūlhai da geren hūlha be gaifi,wesihun tafara be,musei cooha taka buksifi,hūlha teni alin i haihan de isinjime,musei cooha hūlhai faidan be šakalame bireme tucifi,kiru be durifi,hūlha be wara jakade,hūlha afaralame sosorcoro be,hailanca
ekšeme fekšeme wasifi,ishun hetureme afame,hūlhai data be nadan hūlha be juwe tanggū funceme waha,gūsin helen jafaha,hailanca i yarure morin i bethe gidalabuha,ubabe fuk’anggan donjibume wesimbuhede,hese wasimbuhangge,hailanca hūlha be afara de,yarure morin feye bahafi jabšan de tuhekekūngge,yargiyan i dergi abkai karmame aisire de akdahabi,bi giogin arame
gingguleme hengkilehe,mini birgame yabure de,ashaha emu beyebe karmara fucihi be cohotoi šangnafi,eiten baitai sain todolo obukini,hailanca afara dari funturšeme baturularangge,ere ini da banin,damu beye hebei amban ofi holbobuhangge umesi ujen,ereci julesi afara de udu hafan cooha be durulafi kadalame baturu sukdun be huwekiyebume šuwe ibeci acacibe,naranggi gūnime werešeme ujeleme olhošoci acambi,
foihorilame haksan be funtume yabuci ojorakū,ede urunakū targabume tacibuha babe gingguleme dahaci acambi sehe,tere fonde,jing jirung ni amba šancin be afame ibefi,hailanca taifingga i emgi solon i moringga cooha be gaifi amasi julesi bireme afahai,ilan erin ci ulgiyan erin de isinafi afame etefi,hūlhai ninggun tanggū uju faidaha juwe tanggū helen jafaha,ede
hesei saišame šangnaha,jirung ci ibefi solar alin i fejile isinafi,wehei karun ilihabi,amba cooha šuwe ibere jakade,hūlha karun be waliyafi burulaha fargame že so kiyoo toohan de isinaha manggi,hūlha ekšeme toohan be tatame gaiha,amcame muterakū ofi,taka bederefi,jendu amatai sebe unggifi,dergi ergici o lu šan alin dabafi,dergi eyen i
ici jenduken i doome mudalime dulefi,terei doohan karun be gidanara jakade,hūlha burgindufi bira de tuhekengge umesi labdu bihe,jingkini jugūn i hafan cooha nashūn be amcame doofi,uthai že so kiyoo doohan be ejelefi,tereci mi lii ding de ibefi,ududu jergi den alin be dabafi,wangg’ar de isinafi,emu tanggū nadanju ba šumin dosici
hūlha be sabuhakū,wangg’ar i wargi julergi ergide hetu emu bira bi,birai dalin i amargi ergi ba gebu wangdui julergi ba,gebu hiyeburukma dergi ergi ba oci,hetui šancin inu,hūlha teisu teisu karun ilibufi sujame tuwakiyaha,amba cooha wangdui de isinafi,hūlha bira be hahūrafi sujara de,doome muterakū ofi,an i cooha bibufi fiyan tuwabume,
jendu dergi eyen ci moo be ada obume,hoiwatafi(原文如此,应为hūwaitafi)doofi šuwe kedui šancin de nikenefi,hūlhai gūnihakū ci tucire jakade,ambula gidaha,wangdui i jingkini jugūn i cooha inu dooha,ninggun biyade,hiyeburu ci cooha gaifi g’ado i dergi julergi ergi deri yarasaila alin be dabafi,inenggi dobori akū ekšeme yabume,bordungla i julergi alin de isinaha manggi,hūlhai
mooi hoton ilan,karun nadan be sabufi mudalime alin i ninggude tafafi,karun i baru gidaname amantai i emgi wesihun wasihūn hafitame afara jakade,hūlhai hoton karun be gaiha etehe,hūsun de mamlade farganafi,buksiha hūlha be tanggū funceme waha,ede han saišafi,jurgan de afabufi,ilgame gisurebufi,emu jergi nonggiha,yong ya šan alin de kūwaran ilifi,
hūlhai data dahaki seme baime bithe alibuha be ashūha,nadan biyade ibefi,g’alla alin be afara de,ilan jugūn i cooha gemu etehe, etehe hūsun de mohotolo fargame,duibum alin de tafafi,terei karun be durime gaiha,duibum alin ci wasici uthai pailanggu i hetu bira inu,hūlha doohan be hahūrafi sujara de,hafan cooha doohan be durifi doofi,giyargula alin de
feksime tafaka,hūlha latunjiha be amasi julesi okdome afame gemu gidaha,uheri juwe inenggi dobori afafi,juwe amba alin be dabafi,duin mooi hoton,juwan emu amba ajige wehei karun be gaifi,emu amba doohan be durifi ejelehe juwan ilan hūlhai da,ninggun tanggū hūlha be waha,juwan nadan helen jafaha turgunde,dalaha hūlha geleme golofi dahaki
seme baiha,ede hese wasimbufi,dahaha be alime gaifi cooha bederehe,uyun biyade hailanca be uju jergi gung wesibume fungnehe,susai jakūci aniya ilan biyade boode nimeme akū oho,amcame horonggo etuhun seme gebu buhe,tere nerginde tofohon gungge amban i arbun be nirume šanggaha,
han i araha maktacun i gisun baturu bime bodohonggo ofi,baitalabufi hiya ci wesikei gung de isinaha,ba i niyalma solon sei dorgi colgorokongge ofi banihūnjame duin mulfiyen i muduri noho sabirgi kurume šanggaha,arbun be duin mudan niruhabi ambula hūturi fengšen jergilerengge akū,amala boode nimeme akū oho turgunde,amcame hairame nasaha seme wajirakū sehe,
hese wasimbuhangge,hailanca cooha ci beye tucikengge cooha dain de aniya goidaha,ini afaha mudan be toloho seme wajirakū,imbe hūsun buhe amban seci,yargiyan i yertere ba akū,te boode nimeme akū ohongge,dain de tuhekengge de duibuleci ojorakū kooli de tondo be iletulehe jukten i boode dosimburakū,damu ini coohai kūwaran de fafuršame faššaha,ududu feye baha be gūnime,kesi isibume inu
tondo be iletulehe jukten i boode dosimbufi,gungge amban be jilame gosire gūnin be tuwabu sehe,ini jui anlu de gung ni hergen sirabuha,saicungga fengšen i duici aniya dahalame miosihon tacihiyan i ehe hūlha be dailabume nonggifi,sycuwan i k’ai hiyan ku ts’oo bing ni bade hūlha be gisabure de dain de tuheke,jorgon biyade
hesei anlu i jui enteheme jalafun de uju jergi colgoroko baturu gung sirabuha,ningguci aniya juwan biyade nimeme akū oho manggi,hesei anlu i deo ilaci jergi adaha hafan bime,ilaci jergi hiya anceng de sirabuha,ne tušan jai jergi hiya de obuha.

                                                                                                         2011年11月16日始陸續轉寫
                                                                                                         2011年12月26日轉寫完成
                                                                                                              張楚南於遼南大石橋

评分

参与人数 1饷银 +40 粮食 +40 +40 收起 理由
šolon + 40 + 40 + 40 给力

查看全部评分

发表于 2012-9-25 14:34:19 | 显示全部楼层
神啊!!!!!太强大了!!!!!!赞一个~~~~
发表于 2012-9-26 04:57:30 | 显示全部楼层
厉害,而且还是穆麟德…
发表于 2012-10-26 15:52:04 | 显示全部楼层
有原文请发一份
谢谢
发表于 2013-3-28 21:32:44 | 显示全部楼层
为这辛苦的劳动,顶一个
发表于 2013-4-5 16:30:46 | 显示全部楼层
{:soso_e179:}佩服
您需要登录后才可以回帖 登录 | 马上加入

本版积分规则

QQ|Archiver|手机版|小黑屋|满族在线

GMT+8, 2024-3-28 21:42 , Processed in 0.031250 second(s), 11 queries , File On.

Powered by Discuz! X3.4

Copyright © 2001-2021, Tencent Cloud.

快速回复 返回顶部 返回列表