宋熙东满语原创：满族旧事 求雨

牙克石

manju fe baita--aga baire julen
2011ci aniya araha manggi, bi uthai da gaxan ci fakcafi sahaliyan ula de genehe bihe. ere mari genehengge, mini he xihvwan mama i cira be acafi ini emgi manju gisun be tacime bime, geli fe ucun jai julen be donjime taciha bihe.
emu fe baita be donjici, aikabade gvwa niyalma de alarakv oci, mini mujilen uthai elhe akv turgun de, enenggi bi uthai ere baita be geren gucu de majige alaki.
ere julen be jonome gisureci, daci muse manju i fe baita. onggolo, sahaliyan ula i bade, nenehe jalan i niyalmasa aga baire baita. sakda mama minde uttu tuttu seme alahabihe.
juweri isinjiha manggi, abka mafa aga burakv de, maise, turi, sogi ere jergi usin jaka alime muterakv de, gemu becere hamika. niyalmasa uthai arga bodome deribuhe. ai arga ni. tokso i tutala haha niyalma gemu tala de genefi orho sacime bargiyambi, damu sargan gaihangge geneci ojorakv, gemu sargan akvngge asihata jai sargan akvngge sakda haha niyalma. orho be sacime bargiyafi tokso de bedereme isinjifi, ere orho i orho muduri hvwaitame arambi. tereci, ere orho muduri be geren haha niyalmasa tukiyeme gaifi, gaxan i juktehen de benefi juktehen i hvwa de sindambi. utala haha niyalmasa, ere orho muduri be sindaha manggi, uthai emu bade juktehen i dorgi de ilan inenggi dobori ere orho muduri be tuwakiyambi, we ya emke boo de bedereme geneci ojorakv, ere ilan inenggi, emke inenggi emke sain ulgiyan be wafi muduri ejen de dobombi. ere udu inenggi yaya baita be hehe niyalma sabuci ojorakv, juktehen de hehe niyalma tuwanjici ojorakv.
inenggi xun de, ulgiyan be wafi muduri ejen de dobome, dobori isinjiha manggi, geren haha niyalma uthai juktehen i hvwa de dedume amgambi. uttu oho manggi, ilan inenggi duleke.
duici inenggi cimari erde, tokso i haha niyalmasa uthai gemu juktehen de jifi, orho sabu be etufi, gala de moo i mukxan be jafafi ere muduri be sasa tukiyefi giyai de genembi, ere siden de, sargan gaiha ningge jici geli ombi. geren haha niyalma ere orho muduri be tukiyefi giyai de sujume uculeme amba aga hvwar hvwar hvwa, ajige aga ni xuwar xuwar xuwa, alin deri aga gaju, tung(hei he ba i manju i anggai gisun, weji sere gvnin) deri tugi gaju, yafan i jaka hiyaribuha, usin i jaka hiyaribuha, muduri ejen muke benju... ...seme, inenggi dari uttu ojoro de, tere siden de, tokso i niyalma, beye i boo i duka de, emu amba anggara be sindafi, muke jalupi,  orho muduri be tukiyeme uculere haha niyalmasa wei boo i duka be dulerede, ere boo i haha niyalma uthai obokv i anggara i muke be tebufi orho muduri i baru cacumbi. eiten baita, hehe niyalma boo deri tucifi  tuwaci ojorakv. ya emke inenggi aga abka deri agaci ya emke inennggi nakambi.
ere fe baita be donjiha manggi, mini gvnin de, majige amtangga, te jalan i muse manju, enteke fe baita be donjiha bihe ningge labdu akv dere, bi ere be geren manju de alaki sere jakade, uthai fi be jafafi arahabi.

镶黄旗满洲

羡慕啊

鷹擊長空

什么时候能都看懂呢。。。