清代《长白山志》一书中关于长白山景色一段描写

牙克石

golmin xanyan alin be tuwanaha ejetun
elhe taifin i juwan nadaci aniya duin biyai tofohon de. hese golmin xanyan alin serengge. daci mukdeke ba, cohotoi dorgi amban gioroi umene, uju jergi hiya haha juse fiyose, uju jergi hiya seshuri sebe tucibufi. amba halhvn i onggolo giyamun yalufi genekini sehebe gingguleme dahafi, sunja biyai ice duin de juraka, juwan duin de, mukden de isinaha, orin ilan de girin de isinafi, jiyanggiyvn de afabufi, gaxan tokso butha i urse be isabufi fonjici, xanyan alin be sara niyalma akv, uheri da niyaha i mukvn i mafa daimubulu jalan halame buthaxame banjimbihe. se sakdafi nakaha, ini alarangge, daci ehe neyen i bade tehe bihe, ini ama i alara be donjici, xanyan alin de buthaxame genefi, buhv unufi, duici inenggi boode isinjimbihe sembi, ere be tuwaci, xanyan alin, neyen ci goro akv, neyen ubaci goro hanci be fonjici, buthai galai da ehe sei alarangge, olhon jugvn juwan inenggi, mukei jugvn orin inenggi baibumbi sembi, tuttu buthai urse be jugvn joribume, gemu ilata biyai anggala i bele gaisu sefi, geli bele wajifi morin xadarahv seme, jiyanggiyvn bahai de hendufi, bele emu jaha tebufi. juweme neyen de isibufi, belhekini sehe, tereci galai da ehe se weihu de tefi mukei jugvn ci, wesime jurafi, gioroi umene se, gvsai da sabsu be gaifi, olhon jugvn be yabume. ninggun biyai ice ilan de juraka. undehe bira , kurne weji, girsa bira, burka bira, nadan fere hoton, hoifa bira, narhvn bira, dundu alin, joronggo bira be dulefi, neyen de isinaha bici, galai da ehe se inu isinaha, juwan emu de juraki seci. yooni fisin weji. jugvn akv ofi. sabsu juwe tanggv cooha gaifi. moo be sacime jugvn araha, juwan juwe de, teni geren be gaifi. juraka. tere inenggi sabsu gusu sabe takvrafi alanjihangge, tanggv ba funceme yabufi, emu den alin de tafafi, moo de tafafi tuwaci, goro emu alin sabumbi. xanyan elden giltarxambi, ainci xanyan alin dere sere jakade, galai da ehe sebe tana butabume werihe, juwan duin de, sabsu sade acanafi, weji dorgi be muruxeme jugvn arame yabume. juwan ninggun i gersi fersi erinde, bulehen i guwendere jilgan be, ninggun nadan mudan donjiha, tugi talman burifi buru bara umai alin be saburakv. bulehen i guwengke ici jugvn baime geneme, buhv i junta be bahafi, dahalame genehei alin i bethede. isinaha. duin dere de fik seme moo banjifi, terei dolo xehun necin, orho bisire gojime moo banjihakvbi. moo be dulefi, emu ba funceme genehe manggi, wangga wa sur seme bahabume, hacingga hiyan sekteme banjifi, fiyan moo jergi jergi, niyalma i tebuhe gese, suwayan ilha ler seme nade jalukabi, alin i dulin ci, tugi talman burubufi. wesihun tuwame akvnarakv ojoro jaka de,uthai weji dolo tatafi, geren ambasa niyakvrafi, hesei bithe be hvlame wajiha manggi, gaitai tugi talman hetefi. alin i muru getuken i tucinjihe. tuwaci tafanara jugvn bi. geren gemu kiyakiyame ferguweme wajirakv, fasime micume tafame dulin de isinaha manggi, wehei sahaha karan bi, dele necin, tafafi, duin ici hargaxame tuwaci, alin i arbun golmin. oyo muheliyeken, nimanggi xahvn sabumbi. onggolo sabuha xanyan elden dele, yooni juhe nimanggi bihebi. den tanggv ba funcembi, sunja hada enggelehe adali. borhome banjihabi. julergi sunja hada enggelehe adali. borhome banjihabi. julergi emu hada majige fangkala. dukai adali. dulimbade omo bi, umesi xumin, ekcin den susai juda, funcembi, xurdeme dehi ba funcembi, orho moo akv, muke niohon bime, genggiyen, mukei weren irenembi, geren hada niohokon gebgeliyeme enggelehengge, ne tuheki sere adali, sabuha ele urse gemu kiyakiyame ferguwehe. omoi muke eyerakv bime alin i duin dere ci genggiyen xeri jolhome tucifi. ilan amba ula geren birai sekiyen ohobi, amasi eyehengge. sunggari ula, wargi amargi bara eyehenge, neyen bira. jing tuwame bisire de, hadai ninggude yabure emu feniyen buhv sabufi, feksire de, nadan buhv gvlafi tuhenjihe, geren urgunjeme. enduri xangnahangge sefi. hengkilefi alime gaiha. tere fonde, alin de tafakangge, nadan niyalma bihebi, yooni kunesun lakcara jakade, umesi urgunjehe, amasi marifi, tuwaci. gaitai tugi talman buheliyefi. alin be saburakv oho. juwan jakvn de bederefi. neneme tafaka den alin de tafafi tuwaci, ineku farhvn talman de dalibufi, umai be sabuhakv, orin emu de, ehe neyen, sain neyen i jacin bade isinjiha, orin sunja de kiyakv bira de isinjiha, ere uthai neyen birai angga, orin uyunde, kiyakv bira ci sekten, tubehe, gargan, gadahvn, saman, saksi, faksi, sunggari, dogon i jergi uyun ehe be dulefi, nadan biyai ice juwede, girin de isinjiha, juwan juwe de ningguta de genefi, hvi ning ni jergi fe susu be tuwafi. jakvn biyai orin emu de. gemun hecen isinjiha, ere jergi babe tucibume wesimbuhede, hese, daci mukdeke ba, ferguwecukengge jaci labdu, giyan i tukiyeme fungneci acambi. seme. dorgi yamun, dorolon jurgan de afabufi, gisurebufi, golmin xanyan alin i enduri seme tukiyeme fungnefi, sunja colgon i kooli songkoi niyengniyeri bolori, juwe biya, jakvn biya de wecebuhe. xan hai ging bithede, golmin xanyan alin be bo hiya alin sembi, tang gurun bithe de, tai be alin, be xan alin sembi. ming gurun i tung jy bithe de, fe bihe hvi ning fu hoton i julergi teisu emu minggan ninggun tanggv ba, i dubede, golmin minggan ba, den juwe tanggv ba i alin bi. ninggude omo bi, xurdeme jakvnju ba, julergi baru eyefi, yalu ula ohabi, amasi eyefi sunggari ula ohobi dergi baru eyefi aihu ula ohobi, ba na i muru be tuwaci girin ulai dergi julergi teisu emu minggan ilan tanggv ba funcembi, wargi julergi baru eyeme, fung tiyan i jecen ci, mederi de dosikangge be yalu ula sembi, dergi julergi baru eyeme mederi de dosikangge be tumen ula sembi, amargi baru girin ulai hoton be xurdeme dulefi, jase tucifi. wargi ergici non ula acanjifi, dergi baru eyehe, amargi ci sahaliyan ula acanjifi. julergi ci hvrha ula. usuri ula acanjifi dergi amargi baru mudalime eyeme . mederi de dosika, erebe sunggari ula sembi, umai aihu ula sere gebu akv, jelge tei gebulehengge ishunde jurcenjehebi...

黑萨满

。。。。。sain jaka.

鷹擊長空

{:soso_e179:}