江源区松花石博物馆松花砚满文介绍文稿

jahari

吉林省白山市江源区松花石博物馆松花砚满文介绍部分满语文稿，欢迎大家批评指点

gurung ni han i yuwan
sunggari yuwan

golmin xanggiyan alin seqi daiqing gurun i mukdehe ba ome ulandubuhai bi. furdan de dosika manggi, geren jalan i han gemu golmin xanggiyan alin be enduringge alin obume tukiyeme fungnembihe, amba kooli be yabubume golmin xanggiyan alin i enduri seme alame weqembihe, gemun heqen qi jugvn on aldangga goro ojoro jakade, girin jiyanggiyvn de afabufi, mukden i dorolon jurgan qi hafan takvrafi, geren hafasa be dahabume, aniyadari niyengniyeri bolori juwe forgonde qolhon qolhoron i songkoi weqebumbihe. sunggari yuwan seqi golmin xanggiyan alin de banjiha sunggari wehe be folome arahangge, daiqing gurun i erdeni gurung ni han i yuwan obume, sunggari yuwan i gurure bodonggoro foloro qi xu wen suduri de isitala dulimbai gurun i yuwan weilere suduri de umesi oyonggo ba ejelembi. han i adaname bodonggorongge jorime folorongge bimbime daqi dubentele han i yuwan ome qohome gurung ni baitalarangge ojoro jakade, an i irgen de sabuhangge umesi komso, ede inu dulimbai gurun i duin algingga yuwan duibuleqi ojorakv ba. aikabade duin algingga yuwan be wesihun mukvn i banin seqi, sunggari yuwan uthai toktome han i fisen de bi.

sunggari yuwan i gurung ni suduri

sunggari yuwan oqi, amba daiqing gurun i gubqi suduri be hafu bihe. golmin xanggiyan alin i ba de sure beile dekdeke qi lin giyang hoton i da li zi jen de holo manju gurun i han
pu-i
soorin qi nakaha de isitala, ilan tanggv aniya i daiqing gurun ni suduri be lokdori emu fuka kvwarahabi. daiqing gurun i dekdere mukdere gukure be dahame, sunggari yuwan inu fukjin arara badarambure dekjire eberere mukiyere jugvn be aname duleme yabumbihe. daiqing ni fonde, elhe taifin, hvwaliyasun tob, abkai wehiyehe ilan han sunggari yuwan de qohome amuran bimbime, dembei saixame maktambihe, ereqi tulgiyen, dulimbai gurun i yuwan be arame weilere ilan minggan aniya i suduri de umai gvwa emke akv bihe. daljingga mejige siden i iletulehengge, elhe taifin, hvwaliyasun tob, abkai wehiyehe i ilan forgon de tuqike sunggari yuwan umesi labdu, daiqing ni gurung ni dolo folohongge uheri juwe minggan funqeme bi, te biqibe, beging ni fe gurung de asarahangge jakvnju xurdeme bi. saiqungga fengxen i fonde isinaha manggi, eiqi daiqing gurun i hvsun nenehe de isirakv, eiqi dergi amargi ba be salime kadalahangge nenehede isirakv, eiqi gurung ni namun de asaraha sunggari yuwan bayan elgiyen i jergi turgun ojoro jakade, gurun yamun umai golmin xanggiyan alin qi sunggari wehe be sirame gururakv ombihe. doro eldengge qi amasi, dorgi joboqun tulergi jobolon de lohobume manggaxabume, jai de oqi, saiqungga fengxen qi amasi geren han bithei boo i erdeni de amuran ome bitheleme nirume efire xolo gvnin akv ojoro turgun de, ulhiyen ulhiyen i sunggari yuwan inu suduri de ekiyeme nakabumbihe.

daiqing gurun i elhe taifin, hvwaliyasun tob, abkai wehiyehe i forgon i sunggari yuwan

uju, elhe taifin han, daiqing ni gurung ni sunggari yuwan i fukjilasi

a, sunggari wehe gurung de dosika

uhe suqungga emu minggan ninggun tanggv nadanju nadaqi aniya, elhe taifin i juwan ningguqi aniya, dorgi amban gioro umene, uju jergi hiya haha juse fiyose, uju jergi hiya seshuri sebe tuqibufi golmin xanggiyan alin be takvrame tuwanabu manggi, sunja biyai iqe duin de juraka, juwan duin de mukden de isinaha, orin ilan de girin de isinaha, ninggun biyai iqe ilan de girin hoton qi olhon mukei jugvn i sasa golmin xanggiyan alin i baru jurafi, jugvn de sunggari ula i holo de isinahala bade tunggiyehe wehe i huwesi loho suhe be lekefi bula xuwa moo be saqime geterembume jugvn arame ibeneme yabume, labdu joboqun suilaqun be dulembufi teni golmin xanggiyan alin de tafafi weqefi bi. gemun heqen de bederere de, qohome ududu boqo giltari banin neigen narhvn leke be sonjome gaifi elhe taifin han de gingguleme alibuhabi.

e, gurung ni han i yuwan i sekiyen

umene sei alibuha sunggari ula i holo i wehe be boqo niohon giltari banin neigen narhvn nilukan ginqihiyan seme elhe taifin han sabufi boborxome buyeme ofi xaquka saixaquka wehe obume asarabuhabi. sunggari wehe be banin neigen narhvn seme geli leke obuqi ome han bodoro de, yuwan obume araqi aqambi seme gvnifi hese wasimbume, horonggo yangsangga deyen i weilere arara ba de benebufi gebungge faksi de afabume qolime foloho manggi, ududu inenggi dulefi iqe yuwan be julergi bithei boo de benefi han de alibufi bi. elhe taifin han i beye iqe yuwan i behe suire fi ulgara tusami be baiqame qendefi, yala dergi haqin i yuwan arame weilere wehe seme serefi bi. ere haqin i wehe sunggari ula i holo de banjire jakade, han qohome ere haqin i iqe yuwan be sunggari yuwan seme gebulefi, 寿古而质润，色绿而声清，起墨益毫，故其宝也 seme bithelefi folon hergen obume yuwan de folobumbime, qohotoi han gurung de alibume baitala seme afabufi bi, tere qi amasi, sunggari yuwan gurung ni han i yuwan ome han gurung de emhuleme ejelebumbihe.

i, elhe taifin han i sunggari yuwan i qohoton

elhe taifin i sunggari yuwan i qoligan folohon de beye i qohoton bi, julgei miyamigan hergen be dursulehengge labdukan bime yuwan i xurdeme girin de folohongge dehengge kvthvri justangga hergen i jergi alha xufan bi，yuwan i fisai dere de qolihangge folon hergen, gebu qolo, doron i jergi haqin bi, yuwan i folon hergen oqi寿古而质润, 色绿而声清,起墨益毫, 故其宝也seme qolihangge labdukan, fukjingga hergen i gebu qolo oqi康熙年制seme arahangge, sunggari yuwan de
aliha han i doron oqi eiqi体元主人eiqi万几余暇eiqi康熙宸翰eiqi御铭 sere jergi bi. elhe taifin i forgon de araha sunggari yuwan i okqin i durun haqin elgiyen largin, ememungge sunggari wehe i banitaingge boqo hergen be dahame hoseri okqin be arahangge, ememungge okqin i dere de nimaha i wejehegen be bolgime miyamiha, ememungge yuwan i okqin de jakdan, quse moo, nenden ilha, bulehen i jergi nirugan be foloho, eseqi tulgiyen, geli tofohon yuwan i okqin fondo folohongge bihe. daiqing gurung ni han i yuwan gemu mergen erdemungge baksi gebungge faksi qi tuqikengge ojoro jakade, tuttu ofi goidame wesihun qolgoropi bade teme mutembi, gin diyan yang, gu gung wang, huwang xeng yuwan, wang tiyan giowei se be yaya gemu mergen faksi narhvn mumin seme abkai fejergi de algin jalukabi.

o, jui de buhe yuwan i da sekiyen

elhe taifin han kungfuzi be ujeleme doro be wesihulembihe, doro giyan abka na qi nendeme banjire seme akdafi bi. doro giyan be ujui uju den wesihun ba de aname isinabuhabi. agese be qiralame taqibure jakade, in z’eng be taizi oron de juwe mudan tukiyere juwe mudan efulere baita dulembufi, elhe taifin susai juweqi aniya, uhe suqungga emu minggan nadan tanggv juwan ilaqi aniya de, duiqi age in jen be han i yafan de hvlame jibufi, beye emu sunggari yuwan buhebihe. tere yuwan i fisa i dere de一拳之石取其坚，一勺之水取其净seme qolihabi. age be sarasu taqime wesi, giyan be baime yargiyan i yabu, mangga jobolon be getere, yongturulame ibene seme huwekiyebuhebi. ere uthai jui de buhe yuwan i da sekiyen.

u, xangname bure enduringge beleke sunggari yuwan

sunggari yuwan be mafari i yenden i ba i enduringge jaka obure teile akv, elhe taifin han geli tere be juse be taqibure ambasa saisa be hoxxoro arga obumbihe. gurung ni dolo sunggari yuwan be arara weilere ba be ilibumbime, qohome kadalara yamun be ilibufi sunggari yuwan i bodonggoro, qolime foloro, asarara be dasame kadalabumbihe. uhe suqungga emu minggan ninggun tanggv nadanju ilaqi aniya, elhe taifin han i ninju se i jalafun sarin de, geren beise ambasa hvsutuleme erdemu hvman be iletuleme eiqi irgebume fujurun arame eiqi nirume bitheleme elhe taifin han i bithe qooha i dasan faxxan ambalinggv ferguwequke gungge be tukiyeme maktafi, han dembei urgunjeme ofi, ninju nadan sunggari yuwan be xangname buhe manggi, ede gulhun gemun heqen yooni kungguri seme durgebumbihe. han i yuwan be aliha geren ambasa hukxeme aqinggiyame yasai muke tuhembihe manggi, ama mafa be eldembume, juse omosi de isitala gemu derengge ome serefi, boo de ulara erdeni obume juse omosi de ulame tutabumbi.

jai, hvwaliyasun tob han daiqing gurung ni sunggari yuwan i sirasi

hvwaliyasun tob han soorin de tefi, sunggari yuwan be han ama imbe hethe be alibume sirabume gurun be dasabure akdan obume ubui nonggime hairambihe. huwang xeng yuwan, wang tiyan giowei, tang qu wang ilan yuwan foloro mergen faksi be gurung de hvlame dosimbumbime, emu iqe sunggari yuwan i weilere hoxon be nonggime ilibuhabi, geli beye以静为用, 是以永年seme bithelefi yuwan de folobuhabi. nara qanggan giyangsi i giyarime dasara amban de yabure sidende, gemun heqen de dosifi hvwaliyasun tob han be aqarade, tob seme sunjangga inenggi de teisuleme, emu sunggari yuwan be alime bahabihe. honan i giyarime dasara amban tiyan wen jing, jegiyang ni giyarime dasara amban lii wei tuxan de yabure de faxxan qolgororo jakade, inu hvwaliyasun tob han i xangname bure sunggari yuwan be alime bahabihe. han i xangnara bure be alire ambasa hukxeme aqinggiyame yasai muke tuherakvngge akv, gemu erebe ama mafa be eldembume, juse omosi de hvturi kesi ojoro baita obume serembihe.

a, jiyanggiyvn de xangname buhe yuwan i da sekiyen

hvwaliyasun tob han kiqebe malhvn ome yargiyan de faxxambime, soorin de tehe erin de ujui uju mamgiyakv oqi uthai sunggari yuwan be xangname burengge bihe seqina. elhe taifin i gvsin uyuqi aniya i dosikasi, susai nadaqi aniya i syquwan i uheri kadalara amban, susai uyuqi aniya i quwan xan i uheri kadalara amban, hvwaliyasun tob han i ashan i fujin i ahvn amba jiyanggiyvn niyan geng yao, juwan duiqi age i wargi amargi i qoohai toose be alime gaire jakade, hvwaliyasun tob i amaga i jobolon be getereme han be wehiyeme soorin de tebure amba gungge mutebumbihe. uhe suqungga emu minggan nadan tanggv orin duiqi aniya de, niyan geng yao kuke noor i ba be neqihiyenefi etefi mariha manggi, hvwaliyasun tob han geren ambasa be gaifi wargi tob duka qi tuqifi okdome, niyan geng yao de kooli be dabame xangnaha bime, emu iqe sunggari wehe i tungken durun i yuwan buhe. ere yuwan i dere de tumen jalafungga sabingga nirugan folohobi, ede niyan geng yao i amba gungge faxxan be hvwaliyasun tob han i iletuleme saixara be sereme mutembi. ere uthai jiyanggvn de xangname buhe yuwan i da sekiyen inu.

e, hvwaliyasun tob han i sunggari yuwan i qohoton

hvwaliyasun tob forgon i sunggari yuwan i xurdeme girin de miyamigan hergen folohongge umesi komso, damu ilan fali de miyamigan hergen bi, tese i dorgi, juwe fali de hoto durun i yuwan i xenggin de folohongge ferehe singgeri jai hoto i abdaha i miyamigan bi, emu fali gurgu i dere durun yuwan de justangga hergen miyamigan folohongge bi. miyamigan hergen be tuwaqi, dehengge kvthvri justangga hergen baitalabuhangge umesi komso ohobi, toro sabingga senqe i jergi sabi bejilere gvnin bisire miyamigan labdukan tuqimbime, yuwan i hvntahan de inu keksebuku i uju durun sabingga senqe durun i jergi sabi bejilere gvnin bisire durun tuqifi bi. ere forgon de elhe taifin forgon i halfiyan durbejen durun jai halfiyan muheliyen durun yuwan be labdukan i songkolome sirabuha, neigen akv durun i hoto durun yuwan qi tulgiyen, kemuni keksebuku i uju durun yuwan nonggime tuqikebi. esei qala, geli quse moo i jalan i durun wehe i yuwan okqin be fukjin arahabime, yuwan i durun okqin i durun be songkolome dahame eiqi halfiyan durbejen durun eiqi jerin mudangga durun arabumbihe. hvwaliyasun tob sunggari yuwan de an i 以静为用, 是以永年 seme folohongge be folon obumbihe, 雍正年制sere derbejengge fukjingga hergen i yuwan i gebu qolo qi tulgiyen, ememu yuwan i fisa de雍正年制sere duin gidara fukjingga hergen be folohongge yuwan i gebu qolo obumbihe. hvwaliyasun tob fon i yuwan i okqin de folohongge de alin bira i nirugan nenden ilha quse moo i nirugan xu ilha omo tenggin i nirugan haqin haqin i sabingga nirugan i jergi miyamigan gemu bimbime, elhe taifin han i an i baitalaha folon be yuwan i okqin i dere de folofi miyamigan obufi, 多福seme tere be anaha, 多寿sere muheliyen doron inu bi.

ilan, abkai wehiyehe han daiqing gurung ni sunggari yuwan i wesimbuku

abkai wehiyehe han ajigan bithe hvlaha fonde, han mafa inde emu fali hoto i durun i sunggari yuwan buhe bihe, soorin de tefi, ini sunggari yuwan de amuran amtan nonggire teile ekiyen akv, mafa elhe taifin han i buhe hoto i durun i yuwan be erdeni obume beye de gaihai bihe. dorgi baita be uheri kadalara yamun de afabume sunggari yuwan i weilere ton be kemnebume, damu han i baitalara jai ujen ambasa de xangnara teile be akdulame elebuqi uthai ombihe. weilere arara ba be orin jakvn hoxon qi sunja hoxon de obume dasafi, sunggari yuwan i hoxon be gvwa ninggun hoxon qi emu hoxon de obuhabi. ferguwequke faksi narhvn be ujui uju oyonggo obure sunggari yuwan, han beye angga aljarakvqi qisui qihai folome weileqi ojorakv.

abkai wehiyehe han i gvnin de, sunggari yuwan be duwan yuwan de duibulebume mutere teile akv, geli xe yuwan qi ele qolgoropi ombi sembihe. sunggari gu, boqo niohon, narhvn neigen, yuwan de arabume mutembi, behe suiqi duwan birgan de adalixambime, banin xe nemu i dergide bi seme saixame maktambihe. sunggari yuwan be abka i buhe enduringge beleke obume, gurun i erdeni obume wesimbufi bi. abkai wehiyehe i gvsin uyuqi aniya, uhe suqungga emu minggan nadan tanggv nadanju duiqi aniya jorgon biya de, han taigiyan be takvrafi dorgi baita be uheri kadalara yamun de asaraha sunggari wehe be getukeleme baiqabumbihe. tere erin de girin i ilanggeri benjihe sunggari wehe gvsin jakvn fali, tesei dolo baitalabuhangge sunja fali, jakvn yuwan i hoseri jakvn yuwan obume weilebuhengge. damu gvsin ilan fali bifi, han i fulgiyan fi i qohome tuqibufi baitalaqi aqara ba de baitala sehe seme bithelehebi. ere be tuwaqi, han i gvnin de sunggari wehe oqi umesi ujen mangga ombime sunggari wehe be gurubuqi ojorakv ohobihe. abkai wehiyehe han soorin be jafara sidende, damu xu eldengge deyen i aliha bithei da hexen, aisilame iqihiyara aliha bithei da lio yong jai ji siyoo lan, ilanofi i teile de xangname buhebihe.

a, julergi bithei boo i yuwan i durugan i bithe

uhe suqungga emu minggan nadan tanggv nadanju duiqi aniya de, han beye salime julergi bithei boo i yuwan i durugan i bithe be banjibuhangge. mafa ama jai beye i dembei buyere ninggun fali sunggari yuwan be julergi bithei boo i yuwan i durugan i bithei kamqin fiyelen i ujude arabuhabime, geli ini beye bithe i gebu jai xutuqin be bithelehebi. julergi bithei boo i yuwan i durugan i bithe de araha ninggun fali sunggari yuwan oqi, elhe taifin han i juru garudai yuwan jai wehei hengke durun hoseri yuwan, hvwaliyasun tob han i hoto i durun yuwan, abkai wehiyehe han i niohon tugi yuwan muhvlu yuwan jai ho i nirugan lv i bithe yuwan sembi.

e, abkai wehiyehe han i sunggari yuwan i qohoton

abkai wehiyehe han i forgon i sunggari yuwn i dorgi damu ho i nirugan lv i bithe yuwan jai tugi muduri halukan yuwan i xurdeme ba de
miyamigan hergen bi. yuwan i hvntahan seqi duleke juwe jalan i ningge qi getuken i qohoton bi, muheliyen durun halfiyan muheliyen durun jakvn hoxonggo durun abdaha durun i jergi ningge tuqikebi. ere dade damu出天汉，胜玉英，琢为研，纯粹精，敕几摛藻，屡省成 sere folon hergen be baitalambime amala乾隆御铭seme nonggimbihe. doron i hergen oqi daruhai永宝用之, 几暇怡情, 长春居士sere jergi hergen be baitalambihebime geli乾隆年制seme gebu qolo be folombi. abkai wehiyehe forgon i yuwan i okqin oqi amba ubui dulimbai gurun i alin muke i nirugan, ilha gasha nirugan, ilha orho i afaha i jergi daiqing gurun i nirure hvwa i durun be dahame folohongge. abkai wehiyehe han i forgon i yuwan oqi elhe taifin han i durun bimbime geli hvwaliyasun tob han i uran bi, kamqime bargiyafi sasa asarara durun be iletulehengge, yala bahara de umesi mangga sain yuwan inu seqina.

gurung ni yuwan i baitalara ba jai qohoton

taibei i fe gurung ni tumen jakai hvwa de asaraha jakvnju uyun sunggari yuwan i dorgi, yuwan i durun oqi amba ubui golmin durbejengge durun inu. geli ududu muhaliyakan durun, koolingga akv durun, arbun be dursulere durun bi. koolingga akv durun ningge oqi keksebuku i uju i durun i yuwan, keksebuku i durun i yuwan, arbun be dursulere durun i yuwan oqi, quse mooi jalan i yuwan, hoto i durun i yuwan, quse mooi arsun i durun i yuwan, tahvra i durun i yuwan i jergi bi.

daiqing gurung ni sunggari yuwan i oyonggo baitalara ba oqi, uju de oqi, han i fulgiyan fi i arara de baitalan inu,
han i yuwan seme fungnembihe, jai de oqi agese de xangnambime soorin be alire akdan obume, agese be faxxabume sain taqibumbihe, ilaqi de oqi ambasa de xangnambihe, gungge amban be huwekiyebume gurun de faxxabure enduringge jaka inu, duiqi de oqi, alin jai mafari be weqere doloro jaka inu, qohotoi nenehe han i baitalaha sunggari yuwan be faitara boo be sindafi asarambihe. alin jai mafari be weqere jakade, tuqibufi weqembihe. sunjaqi de oqi gurun i beleke obume siyanlo, liokio, solho i jergi gurun i elqin de xanggambihe.

daiqing gurung ni sunggari yuwan i qohoron, uju de oqi, yuwan be umesi narhvn ajige galangga yuwan de arame mutefi baitalaqibe saixame tuwaqibe gemu ombi. jai de oqi, ulhilere yuwan de arame mutembi, ulhi de tebufi gamara de ja ombi, ilaqi de oqi halukan yuwan de arafi abka sahvrun oho de baitalambi. ai haqin i qolime araqibe, gurung ni yuwan oqi gemu yuwan i hoseri bi, ememu ningge de geli yuwan i alikv bi, yuwan i hoseri geli wehe ningge jai moo ningge juwe haqin bi, arahangge faksi narhvn, sunggari yuwan i oyonggo uburi inu.

sunggari yuwan i qohoton

sunggari yuwan oqi muke be asaraqi olhoro de ja akv, behe be suiqi heni majige ekiyerakv qohoton bi. feten narhvn bime nilukan, akdun bime narhvn, bolgo bime genggiyen, boqo siseten elgiyen, hergen sirge eldepi, toksiqi jilgan bi. sunggari yuwan oqi amba ubu niowanggiyan ningge inu. yonggan banjirengge hvdun bime narhvn, behe tuhefi yuwan giltari bime nilhvn, feten ujen, hvwasar serakv, wehei yuwan i dorgi dergi jergi ningge inu. xe yuwan oqi behe be suifi amba hergen arara de sain ombime duwan yuwan oqi narhvn nilukan ofi ajige hergen arara de sain. bithe de ejehengge: sunggari yuwan oqi ser sere qusilengge hirhangga doho wehe inu. dolo fosfor bime ofi qiden i ijurame saka deijimbi, ere wehe be qolifi yuwan obufi behe be suiqi, bithe eiqi nirugan umiyaha de wereneburakv, den jergi yuwan arara wehe inu. sunggari yuwan de gvwa yuwan duibuleqi ojorakv ilan fulu ba bi, juwari oqi olhorakv, tuweri oqi geqerakv, umiyaha werenerakv.

H.Muke

jaci sain !!!~~~