amba jiyanggiyūn be Fiyanggū i wesimbuhe bithe

昂邦章京

（抚远大将军费扬古向康熙帝奏报噶尔丹之死）


amba jiyanggiyūn be Fiyanggū i wesimbuhe bithe.

goroki be amba jiyanggiyūn hiya kadalara dorgi amban be amban Fiyanggū sei gingguleme wesimburengge. Galdan i bucehe, Danjila sei dahara babe ekšeme boolame wesimbure jalin.

amban be, elhe taifin i gūsin ningguci aniya duin biya ice uyun de, Sair Balhasun gebungge bade isinjiha manggi, Ūlet i Danjila sei takūraha Cikir jaisang ni jergi uyun niyalma jifi alarangge. "be Ūlet i Danjila i takūraha elcin, ilan biyai juwan ilan de Galdan Aca gebungge bade isinafi bucehe. Danjila, Noyan gelung, Danjila i hojihon Lasrun, Galdan i giran, Galdan i sargan jui Juncahai be gajime uheri ilan tanggū boigon be gaifi enduringge ejen de dahame ebsi jifi, Baya Endur gebungge bade ilifi, hese be aliyame tehebi. enduringge ejen adarame jorime hese wasimbuci, wasimbuha hese be gingguleme dahame jabumbi. Urjanjab jaisang, Urjanjab i deo Sereng, Aba jaisang, Tar jaisang, Aralbai jaisang, Erdeni Ujat lama se, juwe tanggū boigon be gaifi, Dzewang Arabtan be baime genehe. Erdeni jaisang, Usta taiji, Boroci jaisang Hošooci, Cerimbum jaisang se, juwe tanggū boigon be gaifi, Danjin Ombu be baime genehe. Danjila sei wesimbure bithe, ne mende bi" sembi.


Cikir jaisang sede, "Galdan adarame bucehe, Danjila ainu uthai ebsi jiderakū, Baya Endur bade tefi, hese be aliyambi sembi" seme fonjici alarangge: "Galdan ilan biyai juwan ilan i erde nimehe, yamji uthai bucehe. ai nimeku be sarkū. Danjila uthai jiki seci, morin umesi turga, fejergi urse amba dulin gemu ulga akū yafagan, geli kunesun akū, uttu ojoro jakade, Baya Endur bade tefi, hese be aliyame bi. enduringge ejen ebsi jio seci, uthai jimbi" sembi.


Danjila sei takūraha elcin be gemu ejen i jakade benebuci, niyalma largin, giyamun i morin isirakū be boljoci ojorakū seme, Cikir jaisang be teile, ichihiyara hafan Nomcidai de afabufi, ejen i jakade hahilame benebuhe. Aldar gelung ni jergi jakūn niyalma be, amban be Godoli balhasun de gamafi, tebuhe giyamun deri ejen i jakade benebuki, Danjila i wesimbure emu bithe, Noyan gelung ni wesimbure emu bithe, Danjila i hojihon Lasrun i wesimbure emu bithe be suwaliyame, neneme dele tuwabume wesimbuhe. erei jalin ekšeme gingguleme donjimume wesimbuhe.


elhe taifin i gūsin ningguci aniya duin biyai ice uyun.

Hasutai

dartai andande akv oho!! yala ferguwecuke baita inu!